पुण्यातील गहुंजे येथील महाराष्ट्र क्रिकेट असोसिएशनच्या आंतरराष्ट्रीय क्रिकेट मैदानाला बीसीसीआय आणि आयसीसीचे माजी अध्यक्ष शरद पवार यांचे नाव द्यावे अशी मागणी माजी मंत्री धनंजय मुंडे यांनी महाराष्ट्र क्रिकेट असोसिएशनचे अध्यक्ष आमदार रोहित पवार यांच्याकडे केलेली आहे.
धनंजय मुंडे यांनी यासंदर्भात रोहित पवार यांना एक पत्र लिहिलेले असून त्या पत्रामध्ये आयपीएलच्या धर्तीवर एम पी एल क्रिकेट स्पर्धेचे आयोजन केल्याबद्दल अभिनंदन देखील केलेले आहे. एम पी एल स्पर्धेत धनंजय मुंडे यांच्या मालकीचा छत्रपती संभाजी किंग्ज हा मराठवाड्याचा संघ सहभागी झालेला आहे या पार्श्वभूमीवर धनंजय मुंडे यांनी ही मागणी केलेली आहे.
धनंजय मुंडे यांनी केलेल्या मागणीमध्ये , ‘ मुंबई क्रिकेट असोसिएशन , बीसीसीआय यासोबत आयसीसीचे अध्यक्ष राहिलेले शरद पवार यांचे क्रीडा क्षेत्रात आणि विशेष करून क्रिकेटमध्ये अत्यंत महत्त्वाचे योगदान आहे त्यामध्ये भारतीय महिला क्रिकेटला आंतरराष्ट्रीय दर्जा मिळवून देणे , देशासाठी खेळलेल्या निवृत्त क्रिकेटर व्यक्तींना पेन्शन सुरू करणे असे मोठे निर्णय शरद पवार यांच्या काळात घेण्यात आलेले होते. गुजरातमधील मोटेरा स्टेडियमला ज्या पद्धतीने पंतप्रधान नरेंद्र मोदी यांचे नाव देण्यात आले त्याच धर्तीवर महाराष्ट्र क्रिकेट असोसिएशनच्या मालकीच्या पुणे येथील गहुंजे क्रिकेट स्टेडियमला शरद पवार यांचे नाव द्यावे देण्यात यावे ,’ अशी मागणी रोहित पवार यांच्याकडे करण्यात आलेली आहे.