महाराष्ट्रात किरकोळ कायदा कारणावरून कायदा हातात घेण्याचे प्रमाण वाढलेले पाहायला मिळत असून असाच एक प्रकार जळगाव जिल्ह्यातील अमळनेर इथे समोर आलेला आहे. तमाशा बंदोबस्तासाठी आलेल्या पोलिसाला चक्क धक्काबुक्की करून शिवीगाळ करण्यात आलेली आहे. सिंदखेडा तालुक्यातील वालखेडा येथील एका वीज कर्मचाऱ्यावर याप्रकरणी सरकारी कामात अडथळा आणल्याचा गुन्हा दाखल करण्यात आलेला आहे.
उपलब्ध माहितीनुसार , अमळनेर तालुक्यातील मुडी प्र डांगरी या गावांमध्ये नऊ तारखेला रात्री लोकनाट्य तमाशाचे आयोजन करण्यात आलेले होते. दहा तारखेला पहाटे तिथे हुल्लडबाजी झाली त्यावेळी बंदोबस्तावर असलेले मारवड पोलीस स्टेशनचे हेड कॉन्स्टेबल भरत इशी , भरत गायकवाड , पोलीस पाटील केशवराव दगा पाटील यांनी लोकांना शांत करत घरी जाण्यास सांगितले.
आरोपी प्रदीप आनंदा शिरसाट ( राहणार वालखेडा तालुका शिंदखेडा ) याने त्यानंतर भरत अशी यांना शिवीगाळ सुरू केली आणि धक्काबुक्की करत खाली पाडले. हेड कॉन्स्टेबल असलेले भरत यांनी त्यानंतर मारवड पोलीस स्टेशनला फिर्याद दिलेली असून पुढील तपास पोलीस उपनिरीक्षक बाळकृष्ण शिंदे करत असल्याची माहिती आहे.